स्मिथ रजक,गाैर,२०७८ कार्तिक ०८ गते
ईशनाथ नगरपालिकाकाे नगरप्रमुख संताेष कुमार मेहताकाे निर्देशनमा वडा कार्यालय,स्वास्थ र शिक्षण संस्थाकाे छड्के अनुगमन गरिएको छ । साे नगरपालिकाका निमित्त प्रमुख प्रशासकीय अधिकृत नन्द किशोर गुप्ताकाे नेतृत्वकाे टाेली नगरभित्रकाे सरकारी संस्थाहरूकाे अनुगमन गर्न पुगेका थिए ।
अनुगमनको क्रममा आज आईतवार ईशनाथ वडा नम्बर ९ परोहा डुमरीयामा रहेकाे स्वास्थ्य चौकी,श्री जनता माध्यमिक औरैया र श्री जनता माध्यमिक बिधालय डुमरियामा साे टोलि छड्के अनुगमन गर्न पुगेकाे थियाे ।
अनुगमन टोलिमा हाकिम गुप्ता सँगै स्वास्थ्य शाखा प्रमुख इसराजुल खाँ, शिक्षा संयाेजक राजिन्द्र प्रसाद यादव
लगाएत अभिभावकको उपस्थिति रहेकोे थियोे ।
आज भएको अनुगमनको क्रममा औरैया माध्यमिक बिधालयमा ४ जना शिक्षक अनुपस्थित रहेको पाईएको छ । अनुपस्थित शिक्षक माथी आवश्यक कार्यवाही गर्ने समेत कार्यालय प्रमुखले चेतावनी दिनु भएको छ ।
सबै सरकारी संस्थाहरूमा अनुपस्थित कर्मचारीहरू अनुपस्थित नहुन र आईन्दा यस्ताे गरेमा कडा कार्यवाही गरिने चेतावनी दिदै एक पटककाे लागि वार्निङ्ग दिईएकाे थियोे ।
अनुगमनको क्रममा गुप्ताले शैक्षिक अवस्थामा सुधार ल्याउनका लागि बिद्यार्थी शिक्षक र अभिभावकको महत्त्वपूर्ण भुमिका रहने भएकोले सबैले इमानदार भएर जिम्मेवारी पूरा गर्नु पर्ने बताउनु भयो ।
समाज बिकासको मुख्य मेरुदण्ड शिक्षा भएकोले ईशनाथ नगरपालिकाले शैक्षिक क्षेत्रको चौतर्फी बिकासका लागि बजेट बिनियोजन गरि विभिन्न कार्यक्रम संचालन गरेकोले सहयोग गर्न सबै सरोकारवालालाई आग्रह गर्नु भयो ।
त्यस्तै वडा कार्यालय र स्वास्थ्य संस्थाहरूमा रहेको कमी कम्जोरी लाई पनि सुधार गर्न सुझाव दिनु भएको थियोे ।
