२४ फागुन, रौतहट । १८ पालिका भएको रौतहटमा नेपाल सरकारले एकमात्र पालिकामा खटाएको उपसचिवलाई अन्यन्त्र सरुवा गरेर शिक्षा शाखाका सुब्बलाई निमित प्रशासकिय अधिकृतको जिम्मेवारी दिइएको छ ।
रौतहटको ईशनाथ नगरपालिकामा उपसचिवको दरबन्दीमा दुई महिना अघि मात्र आएका खिम बहादुर भुजेललाई हटाएर सोही पालिकाका शिक्षा शाखाका सुब्बा नन्द किशोर गुप्तालाई निमित प्रमुख प्रशासकिय अधिकृतको जिम्मेवारी मन्त्रालयले प्रदान गरेको छ ।
संघिय मामिला तथा सामान्य प्रशासन मन्त्री राजेन्द्र श्रेष्ठका स्वकिय सचिव दिलिप पटेलले आर्थिक चलखेल गर्दै भुजेलको सट्टामा ईशनाथ नगरपालिकाको शिक्षा शाखाका प्रमुख नायव सुब्बा गुप्तालाई निमित्त कार्यकारी प्रमुखको जिम्बेवारी दिएको पत्र पठाएको हो । सचिव पटेलललाई आर्थिक प्रलोभनमा पारेर गुप्ताले निमित प्रमुखको पद प्राप्त गरेको नगरपालिकाका कर्मचारीहरु बताउछन ।
नगरपालिकामा उपसचिव आउने बितिकै मन्त्रालय धाउने गुप्ता यस अघि पनि यसै गरी हाकिम बनेका थिए । दुइ महिना पहिला ईशनाथ नगरपालिकाको प्रमुखका रुपमा आएका भुजेललाई जिल्लाको कटहरिया नगरपालिकामा पठाएर मन्त्रालयले उप सचिवको ठांउमा सुब्बालाई कार्यालय प्रमुख बनाएर पठाएपछि समस्या उत्पन्न भएको ईशनाथ नगरपालिकाका प्रमुख सन्तोष मेहताले बताए ।
संघिय मामिला तथा समान्य प्रशासन मन्त्रालयका कर्मचारीको आर्थिक चलखेलका कारण रौतहटका स्थानियहरु तहसनहस भएका छन । उपसचिवको दरबन्दी भए पनि रौतहटमा अहेव, शिक्षक, सुब्बा, इन्जीनियरहरुले पालिका चलाउदै आएका छन । मन्त्रालयले खटाएका उपसचिवलाई हाजिर हुन नदिने र सरुवा भएको थाहा पाउने बितिकै बिचौलिया सहित मन्त्रालय पुगेर आर्थिक चलखेल गरी पुन पदको म्याद थप गराउने चलनले स्थानिय दिक्क भएका छन ।
ईशनाथ नगरपालिकामा मात्रै एकवर्षमा चार जना कार्यालय प्रमुख फेरिएको छ । नगर प्रमुखलाई जानकारीनै नदिई गुप्ताले कार्यपालिका बैठक बोलाएको नक्कली माइन्युट खडा गरेर मन्त्रालयमा बुझाएर ईशनाथ नगरपालिकाको निमित्त प्रमुखको पत्र प्राप्त गरेको नगरप्रमुख मेहताले बताए ।
