रौतहट १९ जेठ ।
लामो संघर्ष र परिश्रम पश्चात वीरगञ्जस्थित नेशनल मेडिकल कलेज एण्ड रिसर्च सेन्टरमा अध्ययनरत रामजी रामले एमबीबीएसको परिक्षा पास गरेका छन् ।
शूल्क नतिरेको निहुमा एमबिबिएस चौथो वर्षको परीक्षा दिनेक्रमाम परीक्षा हलबाट निकालिएका रामजी रामले अन्तत: एमबीबीएसको परिक्षा पास गरेका हुन् ।
सरकारले दलति समूदायका चारवटा जाती वादी, डोम, मुसहर र चमारका युवाहरुलाई आफ्नो खर्चमा एमबीबीएस पढाउने कार्यविधि बनाएअनुसार रामजी नेशनल मेडिकल कलेजमा छात्रवृति पाएर भर्ना भएका थिए ।
उनिसँगै अन्य तिन जना दलित समूदायका विद्यार्थी पञ्कजकुमार राम, रूपेशकुमार राम, प्रमोदकुमार रामले पनि सोही कार्यविधि अनुसार एमबीबीएस पढ्न सरकारबाट छात्रवृति पाएका थिए । तर कलेजले उनीहरुसँग पटक-पटक विभिन्न शिर्षकमा अवैध रुपले पैसा माग्दै आएको थियो ।
सरकारले उनीहरुलाई नि:शूल्क पढ्न छात्रवृति प्रदान गरेपनि कलेजले रामजी र अन्य विद्यार्थीहरुसँग शूल्क माग्दै कयौँ पटक परिक्षा हालबाट बाहिर समेत निकालेको थियो भने कयौँ पटक कलेजले उनीहरुलाई परिक्षाको फारमसमेत भर्न दिएको थिएन ।
कलेजले गरिरहेको अवैध शूल्क मागविरुद्ध रामजीलगायत अन्य विद्यार्थीहरुले सामाजिक सञ्जाल र विभिन्न सञ्चार माध्यम मार्फत उठाउँदै आएका थिए । सञ्चारमाध्यमहरुमा समाचार आएपछि कलेजको विरोध हुँदा उनीहरुलाई एक पटकको लागि परिक्षा दिन कलेजले अनुमति दिएपनि अर्को परिक्षामा पुन: त्यही पैसा तिर्नुपर्ने बखेडा ल्याउने गरेको रामजी बताउँछन् । कहिले होस्टेल शूल्कको नाममा त कहिले पुस्तक शूल्कको नाममा कलेजले उनीहरुसँग पैसा माग्ने गरेको रामजी सम्झनछन् ।
अन्तिम पटकको परिक्षामा कलेजले उनीहरुसँग पुन: पैसा माग गरेपछि उनीहरु आइओएमसम्म पुगेका थिए । सञ्चारमाध्यम र सामाजिक सञ्जालमासमेत उनीहरुले परिक्षा दिन पाउनुपर्छ भन्ने माग उठ्न थालेपछि आइओएमकी डिन डा. दिव्या सिंह शाहले उनीहरुलाई परीक्षा दिने वातावरण बनाई दिन कलेजलाई पत्र नै लेखेकी थिइन् । शाहले रामजी र पञ्कजलाई परीक्षामा सहभागी गराउन नेसनल मेडिकल कलेजलाई निर्देशन दिएपछि कलेजले उनीहरूलाई परीक्षामा सहभागी गराएको थियो ।
अन्तत: यत्रो लामो वर्षको संघर्ष पश्चात रामजी राजले आफू एमबीबीएस उत्तिर्ण भएको बताएका छन् । सामाजिक सञ्जालमा आफ्नो बुवासँगको एउटा तस्विर साझा गर्दै रामजीले आजसम्म आफूलाई यो यात्रामा साथ दिनेहरूप्रति आभार व्यक्त गर्दै लेखेका छन्, ‘परीक्षाहरू सकिएको छैन भने म विश्वस्त छु । किनकी एउटा चिकित्सकको परीक्षा रोगहरू र रोगका कारणहरूले हर हमेशा लिरहको हुन्छ । जहिलेसम्म जीवन छ तवसम्म परीक्षाहरू कहिले सकिन्न । जीवनका बाँकि परीक्षाहरूमा यहाँहरूको साथ, हौसला र सहयोग मिलोस भने कामना गर्दछु ।’
