२०७९पौष ३गते
रौतहट । चालू आर्थिक वर्षको पाँच महिना बितिसक्दा पनि ८ स्थानीय तहले बजेट ल्याएका छैनन् । ती स्थानीय तहलाई बजेट ल्याउन सरकारले ताकेता गरेको छ ।
बजेट नल्याउने पालिकामा सिरहाको औरही गाउँपालिका र कर्जन्हा नगरपालिका, धनुषाको नगराइन नगरपालिका र कमला नगरपालिका, सर्लाहीको विष्णु गाउँपालिका र बौधीमाई नगरपालिका,रौतहटको यमुनामाई गाउँपालिका र बाँकेको डुडुवा गाउँपालिका छन् ।
सचिवस्तरीय निर्णयअनुसार संघीय मामिला तथा सामान्य प्रशासन मन्त्रालयले यी स्थानीय तहलाई ताकेता गरेको हो ।
मन्त्रालयका प्रवक्ता रुद्रसिंह तामाङका अनुसार मन्त्रालयले पत्र पठाउँदै बजेटबारे जानकारी गराउन भनेको छ । बजेट नल्याउने पालिकाबारे विभिन्न निकायबाट चासो भई आएको पनि उनले बताए ।
‘अख्तियार दुरुपयोग अनुसन्धान आयोगलगायत विभिन्न नियमनकारी निकायबाट गत आर्थिक वर्षको बजेट हालसम्म पारित नगरेका विषयमा सोधनी भई आएकाले नेपालको संविधान, स्थानीय तहलाई प्राप्त अधिकार तथा प्रचलित कानूनको पूर्ण पालना गरी जनतालाई प्रदान गरिने सेवा प्रवाहमा सुशासन कायम गर्न गराउन हुन मङ्सिर २८ गतेको सचिवस्तरीय निर्णयअनुसार अनुरोध छ’, मन्त्रालयको परिपत्रमा भनिएको छ ।
बजेट पारित नगरेपछि यी स्थानीय तहविरुद्ध उजुरीसमेत परेको छ मधेस प्रदेशका सात र लुम्बिनी प्रदेशको एक स्थानीय तहले आफ्नो वार्षिक बजेट मन्त्रालयको प्रणालीमा प्रविष्ट गरेको देखिँदैन । यद्यपि, त्यस्ता पालिकामध्ये सिरहाको औरही गाउँपालिका तथा कर्जन्हा नगरपालिकाका र रौतहटको यमुनामाई गाउँपालिकाले बजेट ल्याइसकेको जनाएका छन् ।
यी पालिकाको वार्षिक बजेट गाउँसभाबाट पारित भइसकेको भए पनि मन्त्रालयको प्रणालीमा भने अझै पनि प्रविष्ट भइनसकेको जनाइएको छ ।
नेपाल प्रेसबाट
