२०७९पुष ५ गत
रौतहटको माधवनारायण नगरपालिकामा व्यापक भ्रष्टाचार भएको भन्दै सो नगरपालिका विरुद्ध अख्तियारमा उजुरी परेको छ ।
माधवनारायण नगर प्रमुख बैजनाथ प्रसाद यादवले भ्रष्टाचार गरेको भन्दै छानविनका लागि अख्तियार दुरुपयोग अनुसन्धान आयोगको कार्यालय हेटौडामा उजुरी परेको हो ।
मेयर यादवले खाजा र खानाको नाममा नगरपालिकाको लाखौं बजेट हिनामिना गरेको भन्दै नेकपा माओवादी केन्द्रका माधवनारायण नगर कमिटि अध्यक्ष एवं मेयर प्रत्याक्षि देवनारायण भगतले आवश्यक छानविनका लागि अख्तियारको कार्यालय हेटौडामा निवेदन दर्ता गराएका छन् । भगतले दिएको निवेदनको दर्ता नं. २३०३ रहेको छ ।
नगरपालिका कार्यालयको आयोजनामा कुनै कार्यक्रम गर्नुपर्दा मात्र सहभागीहरुको खाजा र खानाको खर्च नगरपालिका कार्यालयले व्यवहोर्ने नियम छ तर माधवनारायणका मेयर यादवले विना कुनै कार्यक्रम नै नगरी जिल्लाको विभिन्न होटलमा खाना र खाजा खुवाएको भनी लाखौं रकम भुक्तानी गराई भ्रष्टाचार गरेको निवेदन सहितको उजुरीमा उल्लेख छ ।
मेयर यादवको आदेशमा विल भपाईको आधारमा गौरमा रहेको राज होटलको ४ लाख ९ हजार ३ सय, चन्द्रनिगाहपुरको एन प्लाजा होटलको २ लाख ४३ हजार र सोही ठाउँको पशुपति होटलको ४६ हजार रुपैया भुक्तानी दिइएको उल्लेख छ ।
नगरको प्रत्येक टोलको पोलपोलमा विजुली वत्ति लगाउने र नगरपालिका भित्रका विभिन्न कार्यालयका लागि आवश्यक सामग्रिहरु खरिद गर्ने नाममा समेत भ्रष्टाचार भएको आरोप छ ।
त्यस्तै कुनै संस्था वा उपभोक्ता समितिको नाममा मात्र पेश्की दिनुपर्ने नियम छ तर नगरपालिकाको रकम हिनामिना गर्ने नियतले नगरपालिकाबाट चारजना कर्मचारीको व्यक्तिगत नाममा लाखौं रकम पेश्की निकासा गरिएको आरोप लगाइएको छ ।
नगरपालिकाको सम्पत्ति हिनामिना गर्नेमाथी आवश्यक छानविन गरी दोषीलाई कार्यवाही गर्न माग गरिएको उजुरीमा उल्लेख गरिएको छ ।
