रौतहट २०७९पुस२१
रौतहट ।चन्द्रपुरका बिभिन्न स्वास्थ्य चौकीमा निशुल्क पाईने औषधीको चरम अभाव भएको छ। औषधी अभावका कारण गरिव तथा विपन्न परिवारका व्यक्ति तथा बिरामी उपचारबाट वञ्चित भएका छन् । चन्द्रपुर नगरपालिकाको वडानं ९ मा रहेको डुमरिया स्वास्थ्य चौकीका प्रमुख जयलाल पंडितले नगरपालिकाको स्वास्थ्य शाखाले सर्बसाधारणले पाँउने निशुल्क औषधी नपठाएकाले समस्या भएको बताए ।
डुमरिया स्वास्थ्य चौकीमा औषधीको नाममा सिटामोल मात्र रहेको प्रमुख पंडित बताउछन । उनले आफुहरुले नगरपालिकालाई ३ महिना अगाडिनै आवश्यक औषधी र संख्याको माग फाराम बुझाएपनि आजसम्म उपलब्ध नभएकाले बिरामीको उपचारमा निकै समस्या आइपरेको गुनासो गर्छन् ।
यो समस्या डुमरियामा मात्र होइन चन्द्रपुर नगरपालिकाका १ वटा अस्पताल, ४ वटा स्वास्थ्य चौकी र ३ वटा सहरी स्वास्थ्य केन्द्रले यस्तै समस्या भोगिरहनु परेको छ । करिब ८० प्रकारका औषधी अस्पताल तथा स्वास्थ्य चौकीबाट वितरण गर्नुपर्ने सरकारी प्रावधान रहे पनि सो चौकीमा हाल सिटामोल मात्र रहेको बुझिएको छ ।
एक सातादेखि चिसो हावा र शीतलहरका कारण सप्तरीमा निमोनिया, रुघाखोकी, स्वासप्रश्वास, दम लगायतका बिरामीको संख्या बढ्दै गएको भएपनि औषधी अभावले प्राईभेट स्वास्थ्य संस्थामा जान बाध्य भएका छन् । निःशुल्क औषधि नपाउँदा आर्थिक अभाव भएका व्यक्ति बाहिर गएर औषधि खरिद गर्न पनि कठिन भइरहेको र खरिद गर्न जाँदा खर्चिलो हुने गरेको स्थानीय दिपक साहले बताए ।
चन्द्रपुर नगरपालिकाको वाडनं १० मा रहेको स्वास्थ्य चौकीमा औषधी नभएको सो स्वास्थ्य चौकीका अहेव गोपाल प्रसाद रामले बताए ।
चन्द्रपुर नगरपालिकाको स्वास्थ्य शाखाका प्रमुख राजेश कुमार ठाकुरले औषधी खरिदको प्रकृयामा रहेको र एक हप्तामा नगरका सवै स्वास्थ्य संस्थामा औषधी पुग्ने जानकारी दिए ।
