२०७८पुस २८ गते
रौतहट । चिसोबाट प्रभावित रौतहटका गरुडा नगरपालिका वडा नम्बर ९ का २० जना गरिब तथा विपन्न ,जेष्ठ नागरिकहरुलाई बिहीबार कम्बल वितरण गरिएको छ । नगर प्रमुख कन्थमनी जयसवालले गरिब तथा विपन्न परिवारलाई कम्बल वितरण गरेका हुन् ।
केही दिन यता मधेशमा लगातार शीतलहर चल्दा गरिब तथा अति विपन्न परिवारलाई असहज भइरहेको अवस्थामा मेयर जयसवालले कम्बल वितरण गरेपछि उनीहरुले राहतको महसुस गरेका छन् ।
चिसोका कारण कसैले पनि अकालमै ज्यान गुमाउन नपरोस् भन्ने उदेश्यका साथ विपन्न परिवारको तथ्याङ्क संकलन गरेर कम्बल वितरण गरिएको गरुडा नगरपालिकाका प्रशासन शाखा प्रमुख प्रशान्त कर्णले जानकारी गराएका हुन् ।
अत्याधिक चिसो र शीतलहरका कारण दैनिक ज्यालादारी गर्नेहरु समस्यामा परेका छन् भने वृद्धवृद्धा तथा बालबालिकाहरु जोखिममा रहेका छन् ।सो अवसरमा गरुडा नगरपालिकाका वडा नम्बर २ कृष्नन्दन सहनी,वडा नम्बर ९ का वडा अध्यक्ष राजेश सहनी,नि.प्रमुख प्रशासकिय अधिकृत रामबाबु राय यादव लगायत भद्रभलादमी,स्थानियहरुको उपस्थिती रहेको थियो । चिसो मौसममा कम्बल पाउँदा स्थानियहरुले मेयर जयसवालको यो कार्यको सराहना गर्दै धन्यवाद समेत दिएका छन् ।
