२०७९फागुन८ गते
रौतहट ।मधेश प्रदेश सरकारका सामाजिक विकास राज्यमन्त्री शेख अब्बुल कलाम आजाद फुलबाबुले प्रादेशिक अस्पताल गौरमा आभाव रहेको चिकित्सकको व्यवस्थापन शीघ्र हुने बताएका छन् ।
प्रादेशिक अस्पताल गौरमा सुरू भएको हिमोडायलाइसिस तथा डि आर एक्सरेको उद्घाटन कार्यक्रममा राज्यमन्त्री आजादले आफ्नो कर्तव्य इमान्दारीका साथ पालन नगर्ने चिकित्सकलाई प्रदेश सरकारले कारबाहीसमेत गर्ने चेतावनी दिए ।
गौर अस्पतालको विगतको अवस्थादेखि अहिले सुधारोन्नमुख रहेको भन्दै राम्रो काम गर्ने चिकित्सकलाई सम्मान स्वरुप पुरस्कृत गर्ने बताए । प्रादेशिक अस्पताल विकास सञ्चालन तथा व्यवस्थापन समिति र प्रमुख मे.सु मिलेर जनताको लागि काम गर्नुपर्नेमा जोड दिदै अस्पतालमा रहेको अभावलाई १५ दिन भित्र पूरा गर्ने प्रतिबद्धता जनाए । चिकित्सकहरुको लागि आवासको व्यवस्था नरहेकोले बाहिरबाट चिकित्सक आउन मान्ने नगरेको गुनासो गरे ।
अस्पताल सञ्चालन तथा व्यवस्थापन समितिका अध्यक्ष मोहमद अनवर हासमीको सभापतित्वमा सम्पन्न भएको कार्यक्रममा प्रदेश सांसद शोभा देवी साह , जनता समाजवादी पार्टीका कन्ंद्रीय सदस्य चुल्हाई राय यादव , किरण ठाकुर , पूर्व मेयरवीरेन्द्र राय यादव ,माधव नारायण नगरपालिकाका उपप्रमुख निर्मला रमन , समाजवादी विद्यार्थी युनियनका केन्द्रीय सदस्य ललन यादवसहित चिकित्सक ,स्वास्थ्यकर्मी सञ्चारकर्मीहरुको सहभागिता रहेको थियो ।
