हेटौंडा–जेठ २४ गते काभ्रेको बनेपा नपा वडा–७ स्थित अरनिको राजमार्गमा भएको सवारी दुर्घटनामा सूक्ष्म अनुसन्धान गरी घटनामा संलग्न रहेकासहितलाई पक्राउ गर्न सफल मानिएका प्रहरी नायव उपरीक्षकलाई असार महिनाका उत्कृष्ट प्रदेश प्रहरी घोषणा गरिएको छ ।
जिल्ला प्रहरी कार्यालय काभेको दरबन्दीका प्रहरी नायव उपरीक्षक हरि खतिवडाले आफूलाई सुम्पिएको जिम्मेवारी कुशलतापूर्वक एवम् प्रशंसनीयढंगबाट सम्पादन गरेको भन्दै उत्कृष्ट प्रहरी घोषणा गरिएको बागमती प्रदेश प्रहरी हेटौंडाले जनाएको छ ।
उनले रामेछाप उमाकुण्ड गापा वडा–१ बस्ने वर्ष ४५ का दोर्जे शेर्पालाई ना. ४ च ४०६९ नम्बर माज्दा गाडीसहित असार २५ गते पक्राउ गर्न सफल भएको, असार ३ गते काभ्रेको पाँचखाल नपा वडा–६ बस्ने माधव घिमिरेले पत्नी तथा ६ वर्षका छोराको हत्या गरी फरार भएको घटनामा अनुसन्धान गर्न सफल भएको, वीपी राजमार्गको लासकोट र माम्ती खोलामा आएको बाढीपहिरोका कारण अवरुद्ध सडक सुचारु गर्न सहयोग गरेको प्रहरीले जनाएको छ ।
सोही समयमा खोटाङ बस्ने आशा राईले सवारीसाधनमा शिशु जन्म दिएकोमा उनी र शिशुको उद्धार गरी धुलिखेल अस्पतालमा समयमै उपचारका लागि ल्याउन सफल भएको, कोरोना महामारी संक्रमणको अवस्थामा विभिन्न सरोकारवालासंग समन्वय गरी अक्सिजन उपलब्ध गराउनु, स्वास्थ्य सामग्री व्यस्थापनलगायत प्रहरी परिचालनमा प्रभावकारी भूमिका निर्वाह गरेको र बिभिन्न मुद्धाका ११ फरार प्रतिवादीलाई असारमा पक्राउ गरी अदालतमा पेश गर्न सफल भएको उल्लेख गरिएको छ । उनीबाट सम्पादित कार्यको उच्च मूल्यांकन गर्दै यसको निरन्तरताका साथै अन्य प्रहरी कर्मचारीलाई प्रोत्साहित गर्न प्रनाउ खतिवडालाई असारको सर्वोत्कृष्ट प्रदेश प्रहरी घोषणा गरिएको हो ।
